పడక సీను

అయ్యగారు ఈమధ్య మారాం చేయడం మేం పట్టించుకోకపోతే ఉయ్యాలలోంచి దూకేయడం. ఏలా పడతాయో తెలుసా చాలా నెమ్మదిగా దిగుతావు చాలాసార్లు, లేదా ఆదమరుపుగా ఉన్నపుడు గోడమీద బల్లి పడుతుందే అలా ఓక్కసారి దూకేస్తావు నేల మీదకు. ఇదో ఆటనీకు. ఆటంటే గుర్తొచ్చింది. నీకు ఓ బొమ్మలపెట్టి ఉందిరా దానిలో చిన్నచిన్న మూతలు, బంతులు వేసి పెడుతుంటే దానిదగ్గరకు పాక్కుంటూ పోయి దాన్ని లాగేసి మరీ ఆడుకుంటు్న్నావురా బంగారు కొండలాగా......

పడుకున్నప్పుడు పిచ్చి ఫోజులన్నీ పెడతావు నిన్ను మీనాన్న ఫొటోలు తీసి ఆనందపడిపోతాడు కావాలంటే చూడు.

జయ బాబయితో......

ఇక జయ బాబాయితో ఎంతగా ఆడతావురా తనని ఎత్తుకోమని పేచీపెడతావు. పాపం కాసేపైనా కూర్చోనీయవు. బాబాయి కూడా నీతో భలే ఆడతాడు. నీ చిట్టి నేస్తం అయిపోతాడు. నిన్ను చూడడానికి ఏదోలా సమయం చూసుకువస్తాడు. తనని నువ్వు గుర్తు పట్టావని తెగ మురిసిపోతాడు.

చిన్నినాన్నతో కొన్ని జ్ఞాపకాలు.......(దొంగోడి అన్నప్రాసన)

బుజ్జోడా నిగురించి రాయాల్సింది బండెడు ఉండిపోయిందిరా...... ఈరోజు ఏలా అయినా పూర్తిచేసేయాలని పట్టుదలతో కూర్చున్నాను. ఆ మొన్న ఎక్కడివరకు వచ్చాను, నీ మొదటి సినిమా అయ్యాకా నీకు తొమ్మిది నెలలకు అనుకున్న అన్నప్రాసన ఎనిమిదినెలలకే చేసేయాలనుకున్నాం. లేదంటే మేము తింటున్నప్పుడు నువ్వు పెట్టమని చూసే చూపులు భరించడం మావల్లకావడంలేదురా......

నాయనమ్మ ఇప్పుడు కాదు ఏదోలా ఈనెలా ఆపుదాం మా పిల్లలకు నేను తొమ్మిదోనెలలోనే అన్నం పెట్టను అన్నారని ఆగితే నీ ప్రతాపం మామీద చూపెడుతున్నావు. ఇక ఇలా కాదని నాన్న నాయనమ్మను ఈసారొచ్చినపుడు అన్నప్రాసన చేయడానికి ఒప్పించాడు.

రాఖీ పండుగరోజు నీకు అన్నప్రాసన చేసేసాం. పుస్తకం, పెన్ను,చాకు, బంగారం ,పువ్వులు, డబ్బులూ, పరవాన్నాం పెడితే నువ్వు పాకలేక దగ్గరలో ఉన్నాయికదాని కత్తిపట్టుకున్నావు, తర్వాత బంగారంము పట్టుకున్నావు. ఇక అప్పటికే నాకు నీరసం వచ్చేసింది. ఏంటిరా భగవంతుడా వీడు వాళ్ళనాన్నలా రచయిత కాకున్నా, మంచిగా చదువుతాడనుకున్నాను ఏంటి కత్తిపట్టుకున్నాడు. అని.

ఇవాళ కూర్చున్నావ్!

బన్నానా, ఇవాళే (ఆగస్టు 4, 2014) నువ్వు మొదటిసారి కూర్చున్నావ్. అమ్మ నేర్పించింది నీకు. ఈ మధ్య ఒక రోజు జరిగింది అమ్మ పదే పదే గుర్తు తెచ్చుకుంటుంది. రాత్రి నీకు అటూ ఇటూ అమ్మా నేనూ పడుకున్నాం. నువ్వు మా మధ్యలో నిద్రపోయావ్ అనుకున్నాం. మామూలుగా ఆ టైంలో నువ్వు నిద్రపోవు. రాత్రి మూడింటి దాకా మా దుంప తెంచాకే పడుకుంటున్నావ్. ఇదేంటి వీడివాళ తొందరగా పడుకున్నాడు, అని నీ మీదుగా మేం అటూ ఇటూ చర్చ మొదలుపెట్టామో లేదూ, నువ్వు అప్పటిదాకా మా తో దొంగాట ఆడినట్టు దిగ్గున లేచి తలెత్తి చూశావు.

ఈ మధ్య అమ్మా నేనూ బండి మీద బయటికి వెళ్లినపుడు నిన్ను మా మధ్యన కూర్చూబెడుతున్నాం. నీకు భయమో ఏమో కానీ నా చొక్కాని చాలా గట్టిగా పట్టుకుంటావు.

సరే, ఇవిగో నీ మొదటి కూర్చున్న ఫొటోలు:

కాస్త ఆలస్యంగా.....అమ్మ

బండోడా నీగురించి రాసిమురిసిపోవాలని ఈ బ్లాగు పెట్టాం, కానీ నిన్ను చూసుకుంటూ మురిసిపోతున్నామే తప్ప నీ కబుర్లు ఇందులో రాయలే పోతున్నాం. చాలా బాధగా ఉంది. కానీ ఏం చేయాలి. కాస్త ఆలస్యమైనా మొదలెట్టాను కాసిని కబుర్లు చెప్పాలని.....

నీకు అప్పుడే ఎనిమిది నెలలు వచ్చేసాయి. బాగా ఆడుతున్నావు. నిన్ను వదిలి వెళుతుంటే ఏడుస్తున్నావు. అప్పుడప్పుడూ మంచాలమీదనుండీ, ఉయ్యాలనుండీ బంగీ జంపులు చేస్తున్నావు.

నీకు ఆరోనెల్లో అన్నం పెడదామంటే నాన్నమ్మ తొమ్మిదికి వాయిదా వేసింది. మేము ఏం తిన్నా ఆశగా మావైపే చూస్తావు. ఆఖరుకు మంచినీళ్ళు కూడా తాగనీయవు. మొన్న ఏం చేసావో తెలుసా నీకు గుర్తుండదులే అందుకే చెపుతున్నా మావిడిపండుమీద నీ ఆకలంతా చూపించావు అది తినడం చూసిన వాళ్ళు ముక్కు మీద వేలేసుకోవాల్సిందే. ఎంత గడుగ్గాయి పనిచేసావంటే మాటల్లో చెప్పలేనురా.... నీ ఆకలి విషయం తెలియని నాన్నమ్మ తొమ్మిదో నెలవరకూ ఆగమంటుంది. నువ్వు ఆగే రకానివి కావని ఆవిడకన్నా నిన్ను కన్న మాకు బాగా తెలుసురా.....

నీకు ఈ మధ్య మేమంటే బాగా అలుసుగా ఉందిరా ముఖ్యంగా మీ నాన్నంటే మరీనూ...పాపం ఎంతో ఆశగా నిన్ను ఎత్తుకు ఆడిస్తుంటే నీ రంపం గోళ్ళతో రక్కేస్తావు. గుండెల మీద జుట్టు నెప్పెట్టేలా పీకేస్తావు. పాపం కదారా....

అక్కడితోనే నీ అల్లరి ఆగిందనుకుంటే పొరపాటే మొన్నకు మొన్న ఏం చేసావో తెలుసా.... నాతో మాట్లాడాలని వచ్చిన నా స్నేహితురాలు నిన్ను ఎత్తుకుంటే ఆవిడను గుర్రమనుకున్నావో  ఏమో తెగ కుదిపేసావు పాపం ఆవిడకు ఒంట్లో బాగాలేదు అది నీకేం తెలుసు తెగ సవారీ చేసేసావు. భయపడి నాకిచ్చేసింది. అలా ఉన్నాయి నీ ఆటలు.

నేల మీద పడుకో పెడితే సరిగా ఉంటావా అంటే అదీ లేదు. పాకడం మాట అటుంచి గోడల పగుళ్ళు వెతికి కాళీలో చేతులు పెట్టి కెలుకుతావు నీకు ఏం సరదానో మరి. ఈ వయసులోనే ఇంత అల్లరి చేస్తున్నాడు కదా పెద్దయ్యాకా మీ పరిస్థితి ఏంటీ అంటున్నాయి విశ్వసనీయ వర్గాలు....:) :)  :)

ఇక ఫిర్యాదుల పర్వం ముగిస్తే........

చాలా బాగుంటుందిరా నీ నవ్వు ఈ నవ్వుతోనే అమ్మాయిలందర్నీ పడేస్తావేమో భవిష్యత్తులో :). మీనాన్నకు నీ నవ్వంటే చాలా ఇష్టం. అంతేకాదు నీకు గుర్తుంటాయోలేదో తెలీదుకానీ మీనాన్న నీకు ఎన్ని పిచ్చి పేర్లు పెట్టి పిలిస్తాడో తెలుసా..... అసలు నాకే గుర్తుండవు. నీతో చాలా బాగా ఆడతాడు మీనాన్న.

నీకు ఉయ్యాల కట్టాను. అలవాటు లేనికారణంగా అనుకుంటాను అందులోనుండీ దొంగ చూపులు చూస్తావు. అంతేకాదు. ఒకటో, రెండోసార్లు పడ్డావు కూడా, అయినా పెద్దగా ఏడవ్వు. అందరూ ముందుకు పాకు తుంటే మా చిట్టిరాజావు నువ్వు మాత్రం వెనక్కు పాకుతున్నావు. ఈ మధ్య మనందరం బుద్దుడిని చూడ్డానికి వెళ్ళాం, నువ్వు చూస్తావా లేదా అనుకున్నాం మీ నాన్నా నేనూ, కానీ వారగా కళ్ళెత్తి చూసి ఆలానే చూపునిలిపేసావు. నీకూ బుద్దుడు నచ్చాడన్నమాట అనుకున్నాం.

ఇంకో పెద్ద విషయం ఏంటంటే పగలంతా హాయిగా నిద్ర పోయి రాత్రికి మా దుంప తెంచుతున్నావురా... నీ అలవాటు ఎంత మార్చాలనుకున్నా మా వల్లకావడం లేదు. నీతో అర్థరాత్రి ఆటలాడుతూ కూర్చుంటున్నాం. ఇద్దరిలో ఎవరికి నిద్ర ఆగడం లేదు. కానీ ఇవేమీ పట్టని నువ్వు చాలా హుషారుగా ఉంటావురా ఆ టైంలో.

నీ ప్రతి చర్యా మాకు అమృతంలా తోస్తుంది. నీకు బోలెడు ఫొటోలు తీసాడురా మీ జయబాబాయి. నాన్నమ్మ ప్రతినెలా తీర్థయాత్రలు చెస్తున్నట్టు నీ దర్శనం చేసుకు వెళుతుంది. :) వచ్చిన ప్రతీసారి మీ నాన్నమ్మకు పెద్ద బిల్లు చేసి పంపుతున్నావు. నీ ఆటలు చూడాలని ఆవిడ వస్తే ఎత్తుకు తిప్పమని తెగ గారం చేస్తావు. పాపం వస్తున్న నిద్రను ఆపుకుని మరీ నీతో ఆటలాడుతుంది నాన్నమ్మ.

ఉగ్గూ, ఉంగాలు తగ్గించి నీలో నువ్వే చిన్నగా కూనిరాగాలు తీస్తున్నావ్. ఇప్పుడిప్పుడే అమ్మా అని చిన్నగా పిలుస్తున్నావనిపిస్తుంది నాకు. నా జుట్టు పట్టుకుని ఏడిచే వరకూ వదలటం లేదురా నువ్వు. మళ్ళీ మీనాన్న వచ్చి విడిపించాల్సిందే. అంత ఉడుం పట్టురా నీది. తెగ గారాలు నేర్చావు.

ఇంకా చాలా చెప్పాలని ఉంది కానీ నా ఒళ్ళో ఉన్న నువ్వు రాయనిస్తేనా.....మళ్ళీ కలుస్తా.

నా శివరాఘవ కబుర్లు.

చిట్టి నాన్నా నీ గురించి చెప్పాలని అనుకుంటున్నానే కానీ సమయం దొరకడంలేదు. పెద్ద బిజీ అయిపోయిందీ లేదు. నా బిజీ అంతా నువ్వే. రోజులో నీ గురించి ఆలోచించేదే ఎక్కువ. నీ అల్లరి నీ కబుర్లే ఎక్కువ నాకు.

నీ ఫస్టు సినిమా

బండోడూ, రాయటం అస్సలు కుదరటం లేదు, అబ్బే ఖాళీయే లేదబ్బా అనలేను గానీ, ఎందుకో ఇటువైపు రాలేదంతే. కానీ ఈ రెండు నెలల్లో ఎన్నెన్ని జరిగిపోయాయని! నువ్వు బండోడూ అన్న నా పిలుపుకు సార్థకత తెస్తూ బుజ్జిముండలాగా కండలగండడులాగా తయారయ్యావ్. ఫేస్‌బుక్లో నీ ఫోటో పెడితే చాలు లైకుల వర్షం. సరే... ఇంతకీ నువ్వు చూసిన మొదటి సినిమా ఏంటో తెలుసా? భవిష్యత్తులో దీని గురించి నువ్వు గొప్పగా ఫీలవ్వకపోవచ్చు, అసలు భవిష్యత్తులో ఈ సినిమా పేరు చెపితేనే ఎవడూ గుర్తుపట్టకపోవచ్చు. కానీ ఏదేమైనా అది నువ్వు చూసిన మొదటి సినిమా. ఏం చేస్తావ్ పాపం. దాని పేరు "రేసుగుర్రం" అని ఉందిలే. హీరో అల్లుఅర్జున్. హైదరాబాద్, కెపిహెచ్‌బి, జెన్‌టియూ దగ్గర ఉన్న "భ్రమరాంభ మల్లిఖార్జున" జంట థియేటర్లలో మల్లిఖార్జున థియేటర్లో ఆడుతోంది. నువ్వు పొట్టలో పడింది మొదలు అమ్మా నేనూ సినిమాలకి వెళ్లటం మానేశాం. అంతకుముందు కొత్తగూడెంలో "ఇద్దరమ్మాయిలతో" సినిమాకి వెళ్లిందే ఆఖరు. మళ్లీ దాదాపు ఏడాది తర్వాత నిన్ను తీసుకుని వెళ్లాం. ముందు అనుకున్నది కాదు. అప్పటికప్పుడు అనుకుని బయల్దేరి పోయాం. తీరా వెళ్తే టికెట్లు అయిపోయాయి. అక్కడి దాకా వచ్చి ఇంక వెనక్కేం వెళ్తాం. అమ్మ "బ్లాకులో తీసేయ్" అని అనుజ్ఞ ఇచ్చింది. నీకోసమని ఆ టికెట్ దాచి ఉంచింది కూడా. ఇదిగో:

సినిమాకి భయపడుతూనే వెళ్లాం, ఎంత గోల పెడతావోనని. కానీ అస్సలు గోల పెట్టకుండా ఎంత బుద్ధిగా చూశావో తెలుసా. మేమిద్దరం సినిమా చూస్తుంటే, కాసేపు నా ఒళ్లోనూ కాసేపు అమ్మ ఒళ్లోనూ పడుకున్న నువ్వు మాత్రం, సినిమా హాలు పై కప్పు మీద ఆడుతున్న సినిమా తెర తాలూకు వెలుగు నీడల్ని చూస్తూ గడిపావు. అప్పుడప్పుడూ సినిమా కూడా చూశావు. అదీ నీ ఫస్టు సిన్మా అనుభవం. 

ఈ రాముడికి సీతెక్కడుంది.

అందరికీ శ్రీ రామనవమి శుభాకాక్షలు......... 

ఇదేమిటి  ఉగాదికి చెప్పని శుభాకాంక్షలు ఇప్పుడు చెపుతున్నాడు అనుకుంటున్నారా అవును మరి రాముడంటే 

అమ్మకున్న ఇష్టం అంతాకలిపి నా పేరుగా పెట్టిందిగా తప్పదు. ఈ రోజు అమ్మ ఉదయాన్నే సీతారాముల కళ్యాణం 

చూసి వచ్చింది. ఆ రాములోరి అందానికి ఎంతగా అమ్మ ఆకర్షితురాలైందంటే ఇంటికి రాగానే  ఈ రామచంద్రుడిని 

పెళ్ళి కొడుకుగా చేసుకుని తెగమురిసిపోయింది.

                           ఇంతకీ నన్ను చూసి మురిసిపోతుందిగానీ సీత ఎక్కడుందో ఇంకా చెప్పదే :)

ఇంకా ఎంతకాలం ఈ బ్రహ్మచారి రాముడినో నా సీత ఎక్కడుందో అసలు ఇంకా పుట్టిందో లేదో :)

ఓరి నీ ఏషాలోయ్...!

బండోడా నీ గురించి రాయటం లేదని అమ్మ చాలా పోరు పెడుతోంది. కానీ రాయాల్సింది ఎంత పేరుకుపోయిందంటే, రాయటానికి చాలా పెద్ద సమయం కావాలి. అలాగని ఆ పెద్ద సమయం కోసం ఎదురు చూస్తుంటే, ఈలోగా రాయాల్సింది మరింత పేరుకుపోయి, అది రాయటానికి మరింత పెద్ద సమయం కావాల్సి వస్తోంది. అందుకనే, రాయాల్సిందంతా రాయకపోయినా, అందాకా చిన్నగా ఈ కాస్త రాద్దామని మొదలుపెట్టాను. తీరా చూస్తే మైండంతా ఆల్రెడీ బ్లాంక ఐపోయింది.

ఈ మధ్య నువ్వు నన్ను గుర్తుపడుతున్నావు. మంచం మీద పడుకున్న నీ కళ్లు మంచం చుట్టూ నేను నడిచి వెళ్తుంటే నన్ను అనుసరిస్తున్నాయి. అప్పుడప్పుడూ నవ్వుతున్నావు కూడా. ఎక్కువసార్లు అది నెర్వస్ నవ్వు. మా తంటాలు చూసి మమ్మల్ని ప్లీజ్ చేయటానికి నవ్వే నవ్వు. ఒక్కోసారి నవ్వుతావు, ఇంకా బహుశా రెండు బుగ్గల్నీ ఒకేసారి వాడటం రాలేదనుకుంటా, ఒక బుగ్గతోనే వంకర నవ్వు నవ్వుతావు. మెడ కూడా నిలబెడుతున్నావు. ఒక్కోసారి ఎటు చూడాలంటే అటు మెడ తిప్పుతావు, ఒక్కోసారి మెడ ఎటు వాలితే అటే చూస్తావు.

నిన్న నిన్ను మొదటి సారి ఇంటి ఓనర్ల దగ్గర వదిలి అమ్మ కోసం హాస్పిటల్‌కి వెళ్లాం. మేం వెళ్లగానే పడుకున్నావు. వచ్చేసరికి గానీ లేవలేదు. ఇంటి ఓనర్లు నువ్వు ఎంత బుద్ధిమంతుడువోననీ అస్సలు ఏడ్చి గోల చేయవనీ అనుకున్నారు. మేం ఇలా ఇంటికి తీసుకొచ్చామో లేదో మళ్లీ నీ పెంకి గోల మొదలుపెట్టేశావు. నిన్న రాత్రయితే ఎంత చక్కగా ఆడుకున్నావొ. రాత్రి రెండింటికి మొదలుపెట్టి తెల్లార ఐదూ ఐదున్నర దాకా ఎన్ని ఆటలు ఆడావో. అమ్మనీ ఆటలు చూస్తూ పడుకోలేక, నిద్ర ఆపుకోలేక చాలా అవస్థ పడింది. ఈ మధ్య నీ ఏడుపుల్లోంచి అప్పుడప్పుడూ పిలుపులు కూడా వస్తున్నాయి. అవి మెల్లగా వుండవు. అరుపుల్లా అరుస్తావు. ఎవరన్నా దృష్టి పథంలో లేకపోతే చాలు "ఉంగాయ్" అనో "అవ్వాయ్" అనో అరుస్తావు. ఒక్కోసారి బాగా హుషారుగా ఉన్నప్పుడు బహుశా మా సమక్షపు పట్టలేని ఆనందం వల్ల అనుకుంటా, చిత్రమైన హెపీ అరుపు అరుస్తావు. అది అరుపు కూడా కాదు, just a squeal లాగా. ఉదాహరణకి ఈ వీడియోలో 11 సెకన్ల దగ్గర:—

ఇంతకీ ఇప్పుడు నువ్వు ఏం చేస్తున్నావో తెలుసా? నా వళ్లోనే ఉన్నావు. నేను కాలి మీద కాలేసి, అడ్డ కాలు మీద నిన్ను పడుకోబెట్టుకుని టైప్ చేస్తున్నాను. నువ్వు మొత్తం కలిపి నా మోకాలి నుంచి అరికాలు దాకా పొడవున్నావు. ఈ మధ్య కాస్త బరువు మాత్రం పెరిగావులే. ఇలా ఒక కాలి మీద మోయటం ఇదివరకంతటి సులభంగా లేదు.'

ఇవాళ జయగాడు వచ్చాడు. చాలాసేపు నీతో ఆడుకున్నాడు. రేపు వాడి పుట్టిన్రోజు.  ఉగాది కూడా. వాడు రెణ్ణెల్లు ముంబయి వెళ్తున్నాడు. నిన్ను చూడననిపించి చాలా సేపు ఆడుకున్నాడు. నిద్ర లేపి మరీ.

నానమ్మ ఎప్పుడు వచ్చి నిన్ను చూద్దామా అని తపించిపోతుంది. కానీ పాపం ఎలక్షన్లు, కసాయి ఎమ్మార్వో రాకుండా నిలేస్తున్నాయి. అందుకనే అందాకా నాన్నమ్మకోసం నీ ఆటల వీడియో ఒకటి అప్లోడ్ చేస్తున్నా. "నానమ్మా, నా యీ చిందుబాగోతం తెల్లారగట్ల నాలుగూ ఐదింటికి" :—

పెద్దాణ్ణి అయిపోతున్నానోచ్

అవును నిజం నేను పెద్దోడిని అయిపోతున్నా తెలుసా? నాకు ఈ నెలలో తల నిలబెట్టడం వచ్చేసింది. ఇంకా ఆటలు ఆడటం వచ్చింది. నాన్నని తెగ కొడుతున్నాను. నాకు నాన్నకు మంచి దోస్తీ అయింది. నాన్న నాకు అమ్మకన్నా మంచి ఫ్రెండ్ తెలుసా. నాతో ఆడతాడు, నాకు ఎన్నో కబుర్లు చెపుతాడు. అసలు నేనే నాన్నకు ప్రపంచం.

 అమ్మ నేను వచ్చాకా నన్ను పట్టించుకోవడం లేదని అస్తమాను గొడవపడుతుంది. ఇక నాన్నమ్మ అయితే నాగురించి విని తెగ సంతోష పడిపోతుంది. నాకు ఈ మధ్య ఎండలు ఎక్కువగా ఉండటం వల్ల ఉక్కగా ఉందని నాన్న చెప్పగానే నాకోసం కూలర్ కొంది. అది వచ్చాకా కాస్త పడుకుంటున్నాను.

                                నాన్నమ్మ కూలర్ కొన్నాకా ఇలా హాయిగా పడుకుంటున్నాను.

 

                            అమ్మ పుట్టినరోజున గుడి నుండి వచ్చాకా మాఇద్దరికీ నాన్నతీసిన ఫొటో

                         ఇది నేను అమ్మ చల్ చల్ గుర్రం ఆడుతున్నపుడు నాన్నతీసిన ఫొటో

ఈ రోజునే నేను పూర్తిగా తల నిలబెట్టింది.

మా ఇద్దరి ఫొటోలు బాగున్నాయి కదూ.

బై మరి మళ్ళీ కలుద్దాం.

రూపాంతరం

                                       

చాలా రోజులయింది కదండీ మనం కలిసి , అవును మీ అందరితో మాట్లాడటానికి నేను కొంచెం బిజీగా ఉన్నానండి.

గత నెలరోజులుగా నా విషయంగా బ్లాగ్ లో రాయడానికి కూడా మా అమ్మ,నాన్నలకు ఖాళీ లేదండీ.

ఏంటంటారా పుట్టినప్పటి నాకూ , ఇప్పటి నాకూ చాలా తేడానే ఉందండి.(రూపురేఖల్లో) 

ఆ పని మీదనే అమ్మ, నాన్న కూడా బిజీ. 

అమ్మేమో నన్ను అందరికీ ఒళ్ళుతో చూపించాలని ప్రతిన బూనితే , మరి నాన్నేమో నాకోసం ఆఫీసు ఎగ్గొట్టి మరీ 

నన్ను బలవంతుడిగా తయారుచేయాలని తీర్మానించుకున్నారు.                 

ఇక నా విషయానికి వస్తే , నాకు బేసిగ్గా  ఏడవడానికి కూడా ఓపిక లేదు. అది మీకూ తెలుసు. మాట్లాడితే  

పులమారడం, కాస్త ఆడుకుంటే ఎక్కిళ్ళునూ.ఈ పరిస్దితుల్లో అమ్మ దగ్గర పాలు ఉన్నా తాగలేను.

అందుకే పాల డబ్బాకు అలవాటు పడ్డాను. ఆ పాలు నా మీద బాగానే పని చేసాయి. ఇక తాగడం మొదలేట్టాను. 

అంతే నాకు ఆకలి పెరిగింది. అమ్మకు బీపీ పెరిగింది(పాలుకలపలేక).

నాన్న మాత్రం డబుల్ డ్యూటీ హ్యపీ. (ఎందుకంటే పెరుగుతున్న నారూపాన్ని చూసుకుని మురిసిపోవడమే పనిగా 

పెట్టుకున్నాడు.  పైకి అందరికీ అమ్మ ఆరోగ్యం బాగాలేదని అందుకే ఇంట్లో ఉండి ఈ నెల వర్క్ చేసుకుంటున్నానని 

వంక పెట్టాడు.).

మొన్న మా చిన్నబాబాయి వచ్చాడు. నన్ను చూడగానే తిన్నాడు "కాజా "నా రూపాన్ని చూసి వాడు వీడేనా 

అంటూ వెళ్ళే వరకూ ఓ క్షణం వదిలితే ఒట్టు.

బలంతో పాటు నాకు ఆటలు, కాళ్ళు చేతులతో తన్నడం కూడా వచ్చింది. 

బాబాయే కాదు. మా మల్లీశ్వరి కూడా నన్ను చూసి మురిసిపోతుంది. కానీ అమ్మ నన్ను ఎవరికీ ఇవ్వదు.

ఇక నన్ను చూసి బక్కగా ఉన్నపుడే తెగ ముద్దులాడే మా నాయనమ్మ ఇప్పుడు చూస్తే ఏలా ఫీల్ అవుతుందో

చూడాలని ఉంది.

                                                  సరే ఇక నా రూపాంతరాన్ని చూడండి మరి.

                                               నాన్న ముద్దులు పెడుతున్నప్పుడు నా ఫోజు

                                                           

                                                         అమ్మ ఎత్తుకోగానే ఆవలిస్తూ నేను.

                                                                 వటపత్ర సాయిలా

                                

                                                  నాన్న నాతో ఫొటో తీయించుకుని తన ఫేస్ బుక్ లో పెట్టుకున్నాడు.    

                             

                                      కడుపు నిండా పాలు తాగితే నాకు వచ్చే మత్తుతో నా ముఖం ఇలానే ఉంటుంది.

         

                                                      ఈ అవతారం కూడా అదే నండి.

                           


                                                ఇది నేను ఎప్పుడూ పెట్టే నా ఇష్టమైన ఫోజు

     

                                      అమ్మ నాకు ఆయిల్ మసాజ్ చేస్తుండగా నాన్న తీసిన ఫొటో

                                           ఇది అమ్మకు నా అన్ని ఫొటోల్లోనూ బాగా నచ్చిన ఫొజు

                                         నాకు కోపం వస్తే అంతే అయిపోయారు అమ్మ, నాన్న

                                                     కాస్త నవ్వించింది అమ్మ అప్పుడు ఇలా

 

                                                    నా దిగంబర రూపాన్ని చూపించాలని ఇలా

                                                             ఆటలప్పుడు నా ఫొజులు

                                                                              ఇదీ అంతే


                                             ఆ ఇక ఉంటానండీ మళ్ళీ కాస్త లావయ్యి కనపడతాను. బై.