మా ముదుపుచ్చి.. తింగరబుచ్చి అన్నీ నువ్వే..

 నీ చిలిపితనం గురించి ఎంత చెప్పినా తక్కువే రా.. ఈమధ్య మాటలు బాగా నేర్చావ్.. ఒక్కోసారి కోపగించుకుంటావ్ కూడా.. నేను విసుక్కున్నా కూడా గమ్మునుంటావ్.. మరోసారి తిరగబడతావ్.. నువ్వు ఏది చేసినా అమ్మకు నాన్నకు ముద్దే.. నీతో సమయం, చేసే అల్లరి అన్నీ బావుంటాయ్. అమ్మగా కన్నా నీ దోస్తీని ఎక్కువగా ఇష్టపడతాను.

ఇద్దరం నాన్నకు తెలీకుండా చేసే పనుల్లో ఎంత రహస్యాన్ని మెంటెన్ చేస్తామంటే.. నువ్వు 007లా నాతో పాటు కూడా వచ్చేస్తావ్.. నాన్నగాడేమో  పాపం నిన్ను ఏం తెలీనోడివి అనుకుంటాడు కానీ.. ముది పుచ్చు అని తెలుసుకోడు.

ఎప్పుడో మన రహస్యాలు బయటపడిపోయి నిన్నూ నన్నూ తన్నినా ఆశ్చర్యం లేదు. చెప్పడం మరిచిపోయాను. నీకు తెలుగు నేర్పులేదని, నేర్పించలేకపోతున్నానని మీ నాన్న నన్ను దెప్పుతున్నాడు. నువ్వు చూస్తే ఇంకా తడుముకుంటూనే ఉంటావ్. నీ మాటలు తెలుగు కోసం పడే పాట్లు అవీ బావుంటాయ్.. చూడు ఎంత అందంగా మాట్లాడుతున్నావో..

నాకు ఇల్లుతుడిచి పెడుతున్నావ్ రోయ్.. ఈమధ్య నాకు నస ఎక్కువైందని చమత్కారాలు, చల్లోక్తులు విసురుతున్నావ్.. నా డ్రస్ లకు నా డాన్స్ కు వంకలు పెడుతున్నావ్... ఇవన్నీ దాటేసి మా ప్రేమ కథ గురించి తెగ ఆరాలు తీస్తున్నావ్.. పెద్దయ్యాకా అని నేను అనగానే బాబాయ్ ఉద్యోగం చేస్తాను. నీకు పెద్దగా బంగారం చీరలు కొంటాలే అని వాగ్దానాలు చేసేస్తావ్.. నాది, నాన్నది ప్రపంచం అంతా నీలోనే దాగుందని తెలుసుకుంటే చాలురా.. నువ్వు నీలా అందంగా, హృందాగా పెరిగితే అది చాలు. 

ఈ అమ్మ జీవితావికి చాలా మోసి అలసిపోయింది. నీ జీవితపు వెలుగులు చూసి తనువు చాలిస్తే చాలు. ఆ పరమేశ్వరుణ్ణి అదే కోరుకునేది. నాన్న, నువ్వు ఇద్దరే నాకు రెండు కళ్ళు. నాలుగో తరగతి తర్వాత నిన్ను స్కూల్ మార్పించాలనే ఆలోచన ఉంది. ఏమో ఎప్పటి మాటది. ప్రస్తుతం నీ నెత్తిన చాలా బరువే ఉంది. ఎలా దింపుకుంటావో ఏమో.. నాలుగో తరగతి తర్వాత ఆలోచిస్తాం ఏం చేయాలన్నది. 

కొత్త కళలు...

 

 

 

చిన్నమ్మా.. నీకు ఎనిమిదేళ్ళు దాటుతున్నాయి.. నీ ఆలోచనలు, నీ వ్యాపకాలను నువ్వు నిర్మించుకోవడం బావుంది. నీ ప్రతి అడుగూ మాకు నచ్చినట్టుగా వేయాలని అస్సలు అనుకోవు. నీతో కలిసి గడిపే సమయం మా ఇద్దరికీ అదే మీ నాన్నకు, నాకు చాలా అపురూపం. మీనాన్నతో చెస్ బాగా ఆడతావు. మంచి మెళకువలు నాన్న నేర్పుతున్నాడు. నువ్వు చదివే ఆ ఇంగ్లీష్ పుస్తకాల గురించి మీనాన్న తెగ తాపత్రయపడుతూ కొనిపెడతాడు. నీకు పుస్తకాలు చదవడం చాలా ఇష్టం దాదాపు చాలా పుస్తకాలు ఈ సంవత్సరంలో చదివేసావు. చక్కగా చదువుతూ ఎంజాయ్ చేయడం నచ్చుతుంది నాకు. అలా అలా నాన్నలా మంచి సాహిత్యం చదవగలిగే సత్తాను సంపాదించాలి.

 

నిన్ను సంగీతంలో పెడుతున్నానని చెప్పినప్పుడు నువ్వు నామీద చాలా అలిగావు. కోపగించుకున్నావు. వద్దన్నావు. వెళ్ళనన్నావు. ఇప్పుడు అలా అనవుకానీ ఎక్కడో నామీద కోపం ఉందని తెలుస్తుంది. నిజానికి చిన్నతనంలో నేను నేర్చుకోవాలన్నా నేర్చుకునే పరిస్థితులు లేవు. నీకు సంగీతం అందుకోసమనే కాదు. నీ ఆరోగ్యానికి సహకరిస్తుందని కూడా, అలాగే నీకు మరో కళ పరిచయం అయినట్టు ఉంటుందని కూడా ఈ నిర్ణయం తీసుకున్నాను. మీనాన్న కూడా సరేనన్నాడు. చాలా సంతోషంగా జూలై నెల నిన్ను మీ గురువుగారు ఉమగారికి అప్పగించాను. జూలై 12, 2023 ఇది నీకు కొత్తలోకాన్ని పరిచయం చేసిన రోజు. నేను కూడా నీతో పాటు నా చిన్ననాటి కల నాట్యం వైపు వెళ్ళాను. సరిగ్గా నీకూ నాకు ఒకరోజు తేడా అంతే.. కానీ నీతో కలిసి పోటీ పడి మరీ ఇలా కళ నేర్చుకోవడం నేను చాలా సంతోషించే విషయాల్లో ఒకటి. చాలా బావుంటుంది నీతో గడిచే సమయం. 

నీలా కొత్తగా ప్రపంచాన్ని తెలుసుకునే పిల్లాడితో పసి మొగ్గతో కలిసి బ్రతకడం నిజంగా నా అదృష్టం అనుకుంటాను. చాలా సంతోషాన్ని మూటగట్టుకుంటాను. ఇంతక మునుపు నీతో దగ్గరగా ఉంటే నాకు దూరంగా పోతావేమోననే బాధ ఎక్కడో ఉండేది. అది భయంగా మారి చాలా రోజులు నిన్ను మీనాన్నకే అప్పగించాను. కానీ ఈమధ్యనే నీతో సమయం గడుపుతుంటే బావుంది. చాలా సంతోషంగా అనిపిస్తుంది. ఎంజాయ్ చేస్తున్నాను. 

ఇక నీ సంగీతం క్లాస్ చాలా చక్కగా జరుగుతుంది. నీకు ఫీజ్ కట్టలేనేమో అనుకున్నాను. ఆ పరమేశ్వరుడు ఆ బాధలేకుండా చేసాడు. నీతో సరిగమలు పాడుతుంటే నా ఆనందం ఏమని చెప్పను. నిండుగా ఇలా చక్కగా నువ్వు ఎదిగి నీ కలల జీవితాన్ని అందుకోవాలి. గొప్ప వ్యక్తిగా నీకు నచ్చిన దారిలో పయనించాలి. మళ్ళీ చెబుతున్నాను నువ్వు మంచి వ్యక్తిగా ఎదగాలి, నీకు తోడుగా నాన్న, నేను ఎప్పుడూ ఉంటాం. మేమే నీకు పిల్లర్స్. చక్కగా చదువుకుంటూ నేను బలవంతంగా అంటించానని ఫీలవుతున్న సంగీతంలో కూడా మంచిగా రాణించాలి. సరేనా.. గుడ్ లక్ నాన్నా... లవ్వూ..

Mnemonic Note: చిన్నోడి వేసవి సెలవులు 2023

నేను Seinfeld రెండోసారి చూద్దామని మొదలుపెట్టి మూడో సీజను దాకా వచ్చేసరికి చిన్నోడికి ఒంటిపూట బళ్లు మొదలయ్యాయి. ఇంక వాడూ నాతో చూట్టం మొదలుపెట్టాడు. అలా ఈ వేసవి సెలవుల్లో రోజుకి రెండు మూడు ఎపిసోడ్లు చొప్పున మిగతా ఏడు సీజన్లూ ఇద్దరం కలిసి చూసేశాం. పెద్దాళ్ల షో అయినా, అందులోని సిల్లీనెస్‌ ని వాడూ చాలా ఎంజాయ్ చేశాడు. వాడికి నాకూ కూడా Kramer కేరెక్టరు అంటేనే ఇష్టం. ఒకటి రెండు ఎపిసోడ్లు వాడి వయసుకి నప్పవనిపించినవి స్కిప్ చేశాను. ఇంకా ఎండలు ముదరని కొన్నాళ్లు మటుకు కొన్ని రోజులు పొద్దుటిపూట్ల ఊరకే వీధుల్లో తిరిగాం. ఎండలు ముదిరి ఇంట్లోకే confine అయ్యాకా ఇక అక్కడ కాలక్షేపానికి వేరేవి వెతుక్కోవాల్సి వచ్చింది. నేను చూద్దామనుకునే సినిమాలూ, చదవాలనుకునే పుస్తకాలూ పూర్తిగా పక్కన పెట్టేశాను. ఇద్దరం చూడగలిగేవీ చదవగలిగేవీ... వాటి జోలికే వెళ్దాం అని నిశ్చయించుకున్నాను. Seinfeld ఒక్క విషయంలో మాత్రమే నా స్థాయికి వాడ్ని లాక్కొచ్చాను. ఇక మిగతావన్నీ వాడి లెవెల్‍కి నేను వెళ్ళాల్సి వచ్చినవే. ఈ వేసవి సెలవుల్లో వాడికి Anime shows, Manga books పరిచయం చేద్దాం అనుకున్నాను. మామూలుగా నెట్‌ఫ్లిక్స్ ఎకౌంట్ వాడికోసమే మెయిన్‌టైన్ చేస్తుంటాను. కానీ అందులో అమెరికన్ షోస్ అన్నీ ఒకే పాటర్న్‌లో, మరీ పొలిటికల్లీ కరెక్టడ్‌గా, అన్నింటినీ తేలిగ్గా తీసిపారేసే టిపికల్ అమెరికన్ హ్యూమరుతో వెళ్తున్నాయనిపించింది. అందుకే Anime, Manga వాడికి పరిచయం చేద్దామనిపించింది. ఎప్పుడో 80'sలో మొదలై ఇప్పటికీ కొనసాగుతున్న Dragon Ball సిరీసులు మొత్తం డౌన్లోడ్ చేసి చూపించాను. నేను కలిసి అన్ని ఎపిసోడులూ చూడలేదు గానీ, నేను మిస్సయిన ఎపిసోడ్లలో కథ ఏమవుతుందో నెట్‌లో చదివి నన్నునేను అప్డేట్ చేసుకున్నాను. ఎందుకంటే, వాడితో మాట్లాడటానికి కామన్ టాపిక్స్ కోసం. ఆ విధంగా Goku అనే ఆధునిక పురుషోత్తముడు ఇద్దరికీ హాట్ టాపిక్ అయ్యాడు. గత ఏడాది నేను సాధించిన గొప్ప విజయాల్లో చిన్నోడికి ఇంగ్లీషు చదవటాన్ని వాళ్లు టీచర్లు నేర్పించలేనిది నేనే ఒంటిచేత్తో నేర్పగలగటం ఒకటి. Diary of a Wimpy Kid మొదటి రెండు వాల్యూములు నేను చదివి వినిపించినా, మూడో వాల్యూము నుంచి ఏడో వాల్యూము దాకా వాడే చదువుకున్నాడు. ఆ ఇన్‍స్పిరేషన్‌తో డైరీ కూడా రాయటం మొదలుపెట్టాడు. దానికి కొనసాగింపుగా ఈ వేసవి సెలవుల్లో One Piece మంగా బుక్స్ కొన్నాను. మూడు వాల్యూములు ఇలా అమెజాన్ నుంచి పుస్తకం రాగానే అలా గంటలో చదివేశాడు. తర్వాతి పుస్తకం కొనటం లేటయితే, ఉన్నదాన్నే మళ్ళీ మళ్ళీ చదువుకున్నాడు. గత వేసవి సెలవుల్లో ఇంగ్లీషు చదవటం నేర్పినట్టే ఈ సెలవుల్లో తెలుగు నేర్పుదాం అని కొన్ని క్లాసులు తీసుకున్నాను కానీ, కంటిన్యువ‌స్‌గా చెప్పటం కానీ నా వల్ల కాలేదు. కలిసి చూసిన సినిమాలు: Ratatoullie, Minnal Murali, The Emperor's New Groove. మిన్నల్ మురళి వాడికి బాగా నచ్చింది. అప్పుడప్పుడూ కలిసి బొమ్మలు కూడా వేశాం. వాడి బొమ్మలు చాలా మెరుగయ్యాయి. అలాగే ఈ నెలతో Chess.com అకౌంటుకి డబ్బులు కట్టాను. ఇద్దరం కలిసి ఆడటం, లేదా ఆ అకౌంటులోకి వెళ్లి అపరిచితులతోనో, చెస్ bots తోనో ఆడటం... అదో కాలక్షేపం. నన్ను తొందరలోనే మించిపోయాడు. అంటే పెద్ద పాయింట్లేమీ కాదు. నాలుగొందలు దాటాడు ఇప్పుడే. ఇలా చెస్ ఆడటం, లేదా యూట్యూబులోకి వెళ్లి Magnus Carlsen, Hikaru, Gotham chess... వీళ్లవో, వీళ్ల గురించినవో చెస్ వీడియోలు చూడటం... అదో పెద్ద కాలక్షేపం. ఇంకోటి, వాడిలొ హ్యూమరు, నన్ను నవ్వించగలగటం నేను కొత్తగా గమనిస్తున్న విషయాలు. అలా మొత్తానికి ఈ వేసవి సెలవులు పొద్దస్తమానం బాగా కలిసి గడిపి ఇవాళ మొదటి రోజు స్కూల్లో దింపాను. నా నైట్ డ్యూటీస్ వల్ల మళ్లీ ఏడాదికి గానీ ఇలా దొరకడు.

అమ్మ చిరునామా నువ్వు..

చిన్న మొలకని జాగ్రత్తగా చూసుకోమని నానీ హెచ్చరించిన ప్రతిసారీ నాకు లోపల ఏం అనిపిస్తుందో తెలుసా.. నీవు నాకు గొప్ప కొడుకులా కన్నా నన్ను అమ్మతనానికి దగ్గర చేసి, చాలా బెంగలనుంచి బయటపడేసిన చిట్టి కృష్ణుడికి నేను ప్రత్యేకించి చేసేదేం ఉంటుంది అని అనిపిస్తుంది. భగవంతుడు నా నుంచి చాలా లాగేసుకుని నిన్ను వాటిని భర్తీ చేసేందుకు ఇచ్చాడేమో అనిపిస్తుంది. నీ ప్రతి కదలికా అందంగా అనిపిస్తుంది. నీ అల్లరి, నీ మౌనం నాకు చుట్టూ చేరి ఆనందంలో తేలిపోయేలా చేస్తాయి. 

ఎన్నో దిగుళ్ళకు నీ చిరునవ్వు సమాధానం. నాలో చాలా దిగులుందని మరిచిపోయేది నిన్ను చూసుకునే.. నువ్వు ఎదిగి నీ కాళ్ళ మీద నువ్వు నిలబడిగలిగేంత వరకూ నీకు చేయూతనిచ్చే శక్తిని ఆ భగవంతుడు ఇవ్వాలని ఆశిస్తున్నాను. చాలారోజులు నీ ఆరోగ్యం గురించి దిగులుండేది. దానినీ దాటావేయో.. నువ్వు చదువులో చురుకు కాదని అనుకున్నంత సేపు లేదు.. నీలోకం అంతా చదువే ఉందిప్పుడు.  అమ్మగా లోపల చాలా గర్వపడుతున్నా దానిని పైకి తెలీనీయను. నిన్ను కసురుకున్నప్పుడు నీకు కోపం వచ్చి ఈ అమ్మను వద్దంటావు చూడు. బాధేస్తుంది. అంత కఠినమైన మాటలు నీ నోటితో అన్నప్పుడు.. నిన్నుచూసి పొంగిపోయిన ప్రతిసారీ లోపల మళ్ళీ భయం కమ్ముకుంటుంది. ఇదేంటి ఇలా నిన్ను పొగిడేసాను. ముద్దాడాను. మురిసిపోయానని అలజడి మొదలవుతుంది. దిష్టి తగులుతుందేమోనని మళ్ళీ నిన్ను కోప్పడతాను. 

మీ నానీ అంటుంది కదా నువ్వు పెద్దవాడవై, ఎదిగి గొప్ప ఆఫీసర్ వి కావాలని.. ఆమె కోరిక. నాకు అంతకన్నా గొప్ప కోరిక ఉంది. నా బాకీలన్నీ నువ్వే తీర్చాలి. నేను సమాధానం చెప్పాలనుకునే వాటికి నా అవమానాలకి అన్నింటికీ నువ్వు జవాబుదారీవని నమ్ముతాను. నిన్ను నిలబెట్టిన రోజున నేను పూర్తి విజయం సాధించినట్టు. నీ ఆలనా పాలనా చాలా శ్రద్ధగా చూసుకోవాలనిపిస్తుంది. ఈమధ్యకాలంలో నిన్ను సరిగా చూసుకోవడంలేదేమోనని లోపల దిగులు కమ్ముకుంటుంది. మళ్ళీ నేనే తమాయించుకుంటాను. నీకు నేను పండన్నా కొనితేగలుగుతున్నానంటే అది ఈమాత్రం కష్టం పడుతున్నందువల్లనే. నన్ను మనిషిగా నిలిపేది ఇదే. లేదంటే నేనూ మరొకరిపై ఆధారపడి బతకాల్సిందే. నీకు పెన్సిల్ కొని ఇవ్వగలిగే అమ్మ ఉందనుకో.. అది నాకు చాలా ఆనందంగా ఉంటుంది. ముఖ్యంగా నువ్వు నామాట విని డైరీ రాస్తున్నావు చూడు. అది ఇంకా ఆనందం నాకు. నీ డైరీకి రాము అనే పేరు పెట్టడం ఇంకా ముద్దు.  అందులో నువ్వు ఏం రాసినా నాకు తెలియకపోయినా మురిపంగా ఉంటుంది. 

చదవడం రాదన్నంత సేపు లేకుండా నువ్వు పుస్తకాలు చదివేస్తుంటే నాకు తీన్మార్ ఆడినంత ఆనందంగా ఉంటుంది. కాస్త గర్వం కూడా.. ఇక నీ బొమ్మలో నాకు చాలా ఇష్టం. వాటితో నువ్వు ఏదోరోజు గొప్పవాడిగా గుర్తింపు పొందుతావేమోనని అనిపిస్తుంది. నీ ప్రతి ఆలోచనలో నేను ఉండకపోయినా నీ ప్రతి అడుగులో వెనుక ఉండాలనేది

అమ్మగా నా కోరిక. బావుండు నా చిట్టి తండ్రి. గొప్పగా బ్రతుకు. ఇప్పుడు కూడా ఈమాటలు చెప్పకపోదును. ఉదయం బుజ్జిగా ముడుచుకుని నువ్వు పడుకున్నప్పుడు నా కడుపులో చిన్నగా బాధ మొదలైంది. నిన్ను ఎన్ని ఇబ్బందుల మధ్య ఈ భూమి మీదకు తెచ్చానో కదా అని.. దినదినం నీ ఎదుగుదలను చూడగలిగే అవకాశం, ఆనందం ఆ పరమేశ్వరుడు ఇచ్చినందుకు సంతోషంగా నమస్కరిస్తూ.. అమ్మ..